ብስም ህዝብን ሃገርን ኤርትራ ፖለቲካዊ ወሻሽም ክቐያይር ዝመሰዮ፣ ግንከኣ ብግዝያዊ መንግስቲ ጥራይ ን27 ዓመታት ተለኽ ዝብል ዘሎ ጉጅለ ህግደፍ፡

ብሳንቡኡ ዘስተንፍስ ሰብን ፖለቲካ ህግደፍ ግን፡ ኣይኮነን ከም ከውሒ ብእሳተ ጎመራ መኺኹ ዝተረረ መትከል ክህልዎ፡ ፖለቲካዊ መትከል ዝቕረጸሉ ሕጋዊ መድረኽ’ውን የብሉን። ሃገር ይመርሕ ኣለኹ ዝብል ውድብ ልዕሊ 24 ዓመት ሕጋዊ ጉባኤ ዘይምክያዱ፣ ሃገር ከም ሃገር ብዘይ ሕገ-መንግስቲ ወይ ቅዋም ክትነብር ምግባሩ፡ ( ነቲ በይኑ ነዲፍዎ ዝነበረ ብቅዋም 1997 ዝፍለጥ ሰነድ ሞይቱ’ዩ ምባሉ) ዘይመትከላዊ ንምዃኑ ካብ’ዚ ዝዓቢ መርተዖ የለን። ስሩዕን ሕጋውን ውድባዊ ጉባኤ፡ ዝሞቱ፣ ዝሃደሙ፣ ዝተኣስሩ፡ ዝደስከሉ መሪሕነቱ ዝመልኣሉ ኣኼባን ዘየካይድ፡ ርእሲ ኹሉ ሃገራዊ ሕግታት ዝኾነ ዝመርሓሉ ዝምረሓሉ ሃገራዊ ቅዋም ዘይብሉ ኣብ ምሉእ ምሕረት ሓደ ሰብ ዝወደቐ ህግደፍ ተሪር ሃገራዊ መትከል ኣለኒ ክብል ፖለቲካዊ ስድነቱ ካብ ምርግጋጽ ሓሊፉ ዝእመን መካትዒ ሓይሊ የብሉን።

ዘነይት ህዝባዊ ሃገራዊ መትከል ዘለዎ መንግስቲ’ኮ፡ ቅድም ቀዳድም ሃገራዊ ሰላም’ዩ ዘስፍን። በተሓሳስባን ብተግባርን ደሞክራስን ደሞክራስያዊ ትካላትን ህይወት ረኺቡ ብነጻነት ክዋሳእን ክዕንብብን’ዩ ዝገብር። ኣምር ሕግን ልዕልና ግዝኣተ ሕግን ኣብ ኣእምሮ ህዝቢ ክሰርጽን ብተግባር ክትርጎምን’ዩ ዝሰርሕ። ድሕረትን ድኽነትን ካብ እንግድዓ ህዝቢ ንምውጋድ ዝዓለመ ዝተጸንዐን ፖሊሲ ልምዓትን ምዕባለን’ዩ ዝኽተል። ኣብ ሓባራዊ ረብሓን ምክብባርን ዝተሰረተ ግሉጽ ናይ ወጻኢ ፖሊሲ ሒዙዩ ዝምድና ዝምስረት። እዚ ናይ ግድን ክህሉ ዘለዎ መሰረታዊ ረቋሒታት’ዚ ህግደፍ ኣብ ዘመሓድራ ዘሎ ናይ ሎሚ ኤርትራ ይትረፍ ብተግባር ከም ሓሳብ ኣሎ ድዩ? መልስና የለን’ዩ። ኣብዘይ ህላወ’ዚ መሰረታዊ ነጥብታት፡ መንግስቲ ኤርትራ ትማልን ሎምን ጽኑዕ ኣመትከሉ ዝብል ደኣ ከባይ ይብገስ? መልስና ሕጂ’ውን ካብ ፖለቲካዊ ስድነት።

ምኽንያቱ እቲ ኢና ዝበሃል ዘሎ ካብ ፖለቲካዊ ስድነት ዝምንጩ ምዃኑ፡ ጭቡጥ ህልዊ ኩነታት ህዝብታት ኤርትራ ምስክር’ዩ። ካብ ሰላም ተስፋ ሰላም የለን። ካብ ደሞክራሲ ጨና ደሞክራሲ የለን። ካብ ሕጊ ኣሰር

ሕግን ፍትሕን የለን። ካብ ልምዓት ኣንፈት ልምዓት የለን። ኩሉ የለን’ዩ። ከም ውጽኢት ናይ’ዚ ከኣ ህዝቢ ይብተን ኣሎ። ልኡላውነት መሬት ይድፈር ኣሎ። ካብ ህላወ ናብዘይህላወ የምርሕ ኣሎ። እዚ ኩሉ ህግደፍ ዘምጸኦ’ዩ።

ካብ’ዚ ጥረ ሓታት’ዚ ንምህዳም፡ ኣብ 1998 ብባርኾት ምምሕዳር ዋሽንግቶን ወራር ተፈጺሙና ብጽንዓት መኪትና ስዒርና፡ ኣብ ሕጋዊ መድረኽ ተማጒትና ባድመ ኣምሊስና፡ ብዝቐደሙን ዝደሓሩን ምምሕዳር ዋሽንግቶን ተዘሪና ፍትሒ ስእኒና፡ ዝመጽአ ይምጻእ ግን መንግስቲ ኤርትራ ወትሩ ኣብ ነቕ ዘይብል ሓራ ፖለቲካዊ መትከሉ ክደጋግም ይስማዕ። ፖለቲካዊ መትከልን ቋንቋ ሕግን ምስ ምልቃቕን ዘይምልቃቕን ቁሸት ባድመ ጥራሕ ከም ዝሰርሕ ገይሩ’ውን ይሰብኽ። ከም ጽንዓት ኣብ መትከል ገይሩ ይምህረሉ። ልዕሊ ባድመ፡ ዝጠፍአ ዘሎ ህዝቢ፡ ዝበርስ ዘሎ መንነት፡ ዝጉሕጓሕ ዘሎ ማዓድናዊ ጸጋታት ሃገር፣ ዝካረ ዘሎ ልኡላዊ ግዝኣት፣ ዝድወን ዘሎ ፖለቲካዊ ምስሊ ከም ዝቅድምን ከም ዝዓብን ኣይስቆሮን ወይ ኣየገድሶን።

ህዝቢ ማእከሉ ዝገበረ መትከል ከምዘይብሉ፡ ብስም ህዝብን ሃገርን ኤርትራ ፖለቲካዊ ወሻሽም ክቐያይር ዝመሰዮ መንግስታዊ ጉጅለ ምዃኑ ህዝቢ ከም ዝፈልጥ ኣይፈልጥን። ናይ ገዛእ ርእሱ ድምጺ መሊሱ እንተሰምዐ ንህዝቢ ዘደናገረ ዘእመነ መሲሉ ስለዝስመዖ ግን ህዝባዊ ክመስል ይፍትን። ወትሩ ኣብ መትከለይ ይብል። “ወይ ጎቦ ኹን ወይ ምስ ጎቦ ተጸጋዕ” ኢሉ ብወግዒ ናይ ኣሜሪካ መጋበርያ ምዃኑ ኣብ መጀመርያ 90ታት ገሊጹ። ድሒሩ ምስ ባድመ ኣተኣሳሲሩ ምምሕዳር ዋሽንግቶን ካብ ግዜ ፈደሬሽን ክሳብ ሎሚ ኣንጻር ረብሓን መሰልን ህዝቢ ኤርትራ እናበለ ቀጻሊ ጎስጓሳት ከካይድ ከምዘይጸንሐ፡ ሕጂ ድማ እነሆ ናይ ተለኣኣኽነት ልቸንሳኡ የሐድስ ከም ዘሎ ከይተሰከፈ ምስ መንግስቲ ኣመሪካ ንዛተ ኣለና ኢሉ። እዚ’ዩ መለለይ መትከል ህግደፍን ህግደፋውያንን። ካብ ዝሓለፈ ኣብ ክንዲ ምምሃር ከም ሕብሪ ነፋሒቶ ገልበጥበጥ ምባል፡ መሬት ክሳብ ዝመሲ ፖለቲካዊ ወሻሽም እናቐያየርካ ምንባር።

ብሓልዮት ደሞክራስያዊ ግንባር ሓድነት ኤርትራ ዝፍኖ፡ ድምጺ ሰላምን ደሞክራስን ኤርትራ 20-04-2018